भरतपुर— चितवनको भरतपुर–९ शरदपुरमा अवस्थित डन एकेडेमीको आयोजनामा “डन एकेडेमी ७–ए–साइड यू–१३ अन्तरविद्यालय फुटबल प्रतियोगिता” को तेस्रो संस्करण शुक्रबारबाट औपचारिक रूपमा सुरु भएको छ। सरस्वती पूजाको अवसर पारेर आयोजना गरिएको यो प्रतियोगिता माघ ९ गतेदेखि ११ गतेसम्म सञ्चालन हुनेछ।
विद्यालयस्तरमै खेलकुद प्रतिभाको खोजी र विकास गर्ने उद्देश्यले आयोजना गरिएको प्रतियोगितामा प्रारम्भिक चरणमा ३२ वटा विद्यालय टोलीले सहभागिता जनाएका थिए। तीमध्ये उत्कृष्ट खेल प्रदर्शन गर्दै डन एकेडेमी, अर्विट स्कुल, नारायणी नमुना माध्यमिक विद्यालय र सिर्जना स्कुल सेमिफाइनल चरणमा पुग्न सफल भएका छन्।
प्रतियोगिताका खेलहरू निकै प्रतिस्पर्धात्मक र दर्शकका लागि रोमाञ्चक बनेका छन्। सेमिफाइनल चरणमा प्रवेश गरेका चार टोली उपाधिको दौडमा रहेकाले विद्यार्थी, अभिभावक तथा खेलप्रेमीहरूको उत्साह उल्लेखनीय रूपमा बढेको देखिन्छ।
आयोजक डन एकेडेमीका अनुसार, यस प्रतियोगिताले विद्यार्थीहरूमा अनुशासन, समूहमा काम गर्ने क्षमता, नेतृत्व विकास र खेल भावना अभिवृद्धि गर्न महत्वपूर्ण भूमिका खेल्ने विश्वास लिइएको छ। शैक्षिक क्रियाकलापसँगै अतिरिक्त गतिविधिलाई पनि समान महत्व दिनुपर्ने सन्देश यस प्रतियोगितामार्फत प्रवाह भएको विद्यालयले जनाएको छ।
यसैक्रममा, छात्रातर्फका फुटबल खेलहरू माघ ११ गते आयोजना गरिने आयोजकले जानकारी दिएको छ। छात्रालाई पनि खेलकुद क्षेत्रमा सक्रिय सहभागिताका लागि प्रोत्साहित गर्ने उद्देश्यले छात्रा प्रतियोगिता समावेश गरिएको जनाइएको छ।
प्रतियोगिताका विजेता र उपविजेता टोलीलाई ट्रफी, मेडल तथा प्रमाणपत्र प्रदान गरिनेछ। बाँकी खेलहरू अझै रोचक हुने अपेक्षा आयोजकले व्यक्त गरेका छन्।
