दमौली ।भौगोलिक हिसाबले तनहुँ सुगम जिल्लामा पर्छ । जिल्लाका अधिकांश ठाउँमा मोटरबाटोको पहुँच छ । तर तनहुँमै एउटा यस्तो गाउँ पनि छ जहाँ अहिलेसम्म मोटरबाटो पुगेको छैन ।
तनहुँको आँबुखैरेनी गाउँपालिका ४ आमडाँडा, खस्राङ, दुवा बेलडाँडा मोटर गुड्ने सडकको पहुँचबाट टाढै छ । पृथ्वी राजमार्गको आँबुखैरेनीसँगै जोडिएका यो वडाका ३ गाउँमा मोटर गुड्ने बाटो नपुग्दा सुत्केरीलाई डोलीमा बोकेर अस्पताल लैजानुपर्ने बाध्यता छ ।
सुत्केरी वा बिरामी हुँदा डोली वा डोकोमा बोकेर अस्पताल लैजानुपर्ने बाध्यता रहेको आँबुखैरेनी गाउँपालिका ४ का वडा सदस्य प्रेमबहादुर गुरुङ बताउँछन् । यी गाउँबाट सडकको पहुँचसम्म पुग्न एक, दुई घण्टा पैदल हिँड्नुपर्छ ।
‘गाउँसम्म जाने मोटरबाटो छैन, सुत्केरी हुँदा र बिरामी पर्दा यहाँका स्थानीयलाई सास्ती छ,’ गुरुङले भने, ‘डोलीमा बोकेर लैजानुको विकल्प छैन ।’ वडाकै अन्य गाउँमा मोटरबाटोको पहुँच पुगे पनि यी गाउँ वर्षौदेखि मोटरबाटोको पहुँचबाट टाढा रहेको गुरुङको भनाइ छ ।
सुत्केरी हुँदा हिँडेर भरतपुर महानगरपालिकाको पाँचकिलोसम्म आउनुपर्छ । त्रिशूली नदीको पार गरेपछि मात्रै मुग्लिन–नारायणगढ खण्डको पाँचकिलो पुगिन्छ । त्यहाँ पुगेपछि मात्रै सवारी साधन पाइन्छ ।
अरु बेला पनि यहाँका स्थानीय यही पुल तरेर पैदल नै गाउँ आउँजाउ जाने गर्दछन् । ‘बजारमा किनमेल गर्न जान परे पनि समस्या उहीँ हो, पाँचकिलो झरेर मुग्लिन, चितवन वा आँबुखैरेनी जानुपर्छ‘, गुरुङले भने, ‘यो गाउँका बारेमा सबैलाई जानकारी भए पनि अहिलेसम्म प्राथमिकतामा परेको छैन ।”
सोमबार आमडाँडा निवासी सुत्केरी हीरा गुरुङलाई डोलीमा राखेर आँबुखैरेनी अस्पतालसम्म पुर्याइयो । उनलाई डोलीमा हालेर २ घण्टा पैदल हिँडेपछि पाँचकिलोमा एम्बुलेन्स बोलाएर आँबुखैरेनी अस्पताल लगिएको थियो । ‘पहिले भरतपुर लैजानुपथ्र्यो, अहिले गाउँपालिकाले आफैले आँबुखैरेनी अस्पताल सञ्चालन गरेपछि भने त्यही लैजाने गरेका छाैं,’ उनले भने ।
सुत्केरी भएपछि पुनः उहाँलाई त्यसरी नै बोकेर घर पुर्याइएको थियो । ֮घर फर्किने बेलामा पनि आँबुखैरेनी अस्पतालबाट पाँचकिलोसम्म एम्बुलेन्समा ल्यायौँ, त्यहाँबाट झोलुगें पुल तरेपछि पुनः डोलीमा राखेर दुई घण्टा हिँडेर घर पुर्यायौं,’ उनले भने ।
मोटरबाटोको पहुँच नपुगेको ती ठाउँमा मोटरबाटो पुर्याउनका लागि आवश्यक बजेट विनियोजनका लागि गाउँसभामा कुरा उठाएको गुरुङले सुनाए । ‘जनतालाई निकै सास्ती छ, जनताको आवाज गाउँसभासम्म पुर्याए पनि सुनुवाइ हुन सकेको छैन,’ उनी भन्छन् ।
आँबुखैरेनी गाउँपालिका अध्यक्ष शुक्र चुमानले पुलजीपतर्फबाट उक्त गाउँमा मोटर चल्ने भए पनि बाटोको समस्याका कारण सवारी साधन नियमित नचल्दा दुःख हुने गरेको जनाए । ‘त्यस भेगका सर्वसाधारणलाई पुलजीपतर्फ आउनभन्दा मुग्लिन नारायणगढखण्डको पाँचकिलो झर्न चाँडै हुन्छ, पुलजीपतर्फको बाटो अप्ठ्यारो भएकाले नियमित गाडी नचल्दा जनतालाई सास्ती भएको छ,’ चुमान भन्छन् ।
घुमाउने र मुग्लिनको बीच भागमा पक्की पुल नहुँदा सर्वसाधारणलाई सास्ती भएको चुमानले सुनाए । ‘त्यस भेगका जनतालाई पाँचकिलो झरेर मुग्लिन, नारायणगढ जान पायक पर्छ’, उनी भन्छन्, ‘पक्की पुल नभएकाले पनि डोलीमा बोकेर आउनुपर्ने बाध्यता हो ।’
त्यहाँ सडक निर्माणका लागि भएको डिपिआर अनुसार १ अर्बको हाराहारीमा बजेट चाहिन्छ । ‘गाउँपालिकाले मात्रै निर्माण गर्न सक्दैन,’ अध्यक्ष चुमान भन्छन्, ‘प्रदेश र संघ सरकारको सहयोग बिना यो सम्भव पनि छैन । मेरै कार्यकालमा यो सडकमा गाडी चल्ने र कालोपत्र पूरा हुन्छ ।’-रासस
