बेनी ।
म्याग्दीको धवलागिरि गाउँपालिका २ लुलाङस्थित ४२ किलोवाट क्षमताको दरखोला दोस्रो लघुजलविद्युत् परियोजनाको विद्युत् गृहमा पहिराले क्षति पुर्याएको छ ।
बिहीबार मरेनीस्थित विद्युत्गृह माथिको भिरबाट खसेको पहिराले विद्युत्गृहमा क्षति भएको हो । विद्युत्गृहको उपकरण पहिराले पुरिएर क्षति भएको वडाध्यक्ष अकप्रसाद विकले बताए । कतिपय उपकरण पहिराले दरमखोलाको बगरसम्म नै पु¥याएको छ । मुख्य पाइप लाइनमा समेत क्षति भएको छ ।
विद्युत् आपूर्ति बन्द भएपछि सिंगो वडा नं २ का बासिन्दा बिजुलीबाट बञ्चित भएका छन् । घरेलु उद्योग बन्द भएका स्थानीय भक्त सिङ्किजा पुनले जानकारी दिए । परियोजनाबाट उत्पादन भएको बिजुलीबाट वडा नं २ का लुलाङ, लमसुङ र खोरियाका करिब ४ सय परिवार लाभान्वित भएका थिए ।
२ वर्षअघि बाढीले परियोजनाको नहर, बाँध र विद्युत्गृह बगाएपछि गत वर्षमात्रै मर्मत गरेर यस परियोजनाको विद्युत्गृह नै स्थानान्तरण गरेर परियोजनालाई पुनः सञ्चालनमा ल्याइएको थियो । लाखौँ खर्च गरेर मर्मत गरी सञ्चालनमा ल्याएको परियोजनाको विद्युत्गृह १ वर्षमै पहिराले क्षति पुर्याएको छ । स्थानीयले परियोजनाको मर्मत सुधारसँगै केन्द्रीय विद्युतीकरणको पहुँच विस्तारमा ध्यान दिन माग गरेका छन् । परियोजना पुनः निर्माणका लागि २ वर्षअघि गाउँपालिकाले १२ लाख र स्थानीय पूर्वाधार विकास कार्यक्रममार्फत १० लाख खर्च भएको थियो ।
विसं २०७६ मा वैकल्पिक ऊर्जा प्रवद्र्धन केन्द्रको ८५ लाख ९७ हजार, जनश्रमदान ३३ लाख, गाउँपालिकाको ५० लाख र स्थानीयबाट चन्दा संकलन गरी परियोजना निर्माण गरिएको थियो । यसअघि २०७२ साउनमा जुगेपानीमा आएको पहिराले विद्युत्गृह र नहर बगाएपछि मरेनीको फेदीमा परियोजना स्थानान्तरण गरेर पुनःनिर्माण गरिएको थियो ।
