काठमाडौंमा शुक्रबार साँझ आयोजित विशेष संगीत कार्यक्रममा कन्दाराले करिब दुई घण्टासम्म दर्शकलाई लाई आफ्नो प्रस्तुतीले मोहित बनायो। राजधानीको चिसो मौसमलाई तताउँदै ब्याण्डको ‘सोसल इम्प्याक्ट इन्टरटेनमेन्ट’–ले वातावरणलाई ऊर्जाशील र उत्साहपूर्ण बनायो।
दोस्रोपटक संघीय राजधानीमा प्रस्तुत हुन आएको कन्दाराले ठमेलस्थित एक्सओ क्लबमा स्टेज सम्हाल्दै आफ्नो प्रसिद्ध लोक–पप शैलीका गीतहरू प्रस्तुत गर्यो।
रातको १० बजेतिर मुख्य गायक विवेक श्रेष्ठ स्टेजमा प्रवेश गर्दा क्लबभरिको माहोल झनै तातिएको थियो। उनले दर्शकलाई अभिवादन गर्दै ‘रिदम अफ चेन्ज’ नाममा अघि बढाइएको अभियानको उद्देश्यसम्बन्धी कुरा पनि साझा गरे।
प्रस्तुतिका बीच–बीचमा कन्दराले मुलुकको राजनीतिक, सामाजिक र सांस्कृतिक अवस्थाप्रति चिन्ता व्यक्त गर्दै परिवर्तनको पक्षमा स्पष्ट सन्देश दियो।
भ्रष्टाचारको अन्त्य, सुशासन, आर्थिक स्थिरता र सामाजिक रूपान्तरणको पक्षमा मुख्य गायक विवेकले व्यक्त गरेको मतलाई दर्शकहरूले ताली र जयजयकारसहित साथ दिए।
“मुलुक परिवर्तनको संघारमा छ। संगीतमार्फत हामीले परिवर्तनको यात्रामा हातेमालो गर्न खोजेका हौं। यो कन्सर्ट हाम्रो आवाज हो,” गायक श्रेष्ठले भने।
अब कन्दरा ‘रिदम अफ चेन्ज’ विश्व टूरमा निस्कँदैछ। उत्तर अमेरिका, युरोप र अस्ट्रेलियाका विभिन्न शहरमा प्रस्तुति दिने तयारी भइरहेको ब्याण्डले जानकारी दिएको छ। त्यसअघि नेपालका प्रमुख सहरहरूमा समेत विशेष टूर गर्ने योजना बनाइदैछ।
विशिष्ट इन्टरनेसनलले एक्सओ क्लब र हाई इन्टरटेनमेन्टको सहकार्यमा ‘काठमाडौं कलिङ कन्दरा’ कार्यक्रम एक्सओ क्लबमै आयोजना गरेको हो।
३२ वर्षअघि पोखरामा स्थापना भएको कन्दरा आज पनि नेपाली संगीतप्रेमीको मनमा उस्तै रूपमा बसिरहेको छ।
चन्चले कान्छी, हङकङ पोखरा, तगारोमा रुमाल राखी, भेडीगोठैमा, लेककी हे माया जस्ता कालजयी गीतहरूले ब्याण्डलाई आजको स्थानमा पुर्याएका छन्।
ब्याण्डको लिड भोकलिस्टमा विवेक श्रेष्ठ, ड्रममा सुनिल थापा, मादलमा अविनाश गायक, बासिस्टमा पंकज झा, गितारमा सन्देश मुजो, किबोर्डमा नील घतानी, साउन्ड इन्जिनियरमा सिमोस तझ्या र प्राविधिक विज्ञमा नवीन थापा छन् ।
तस्वीर सौजन्य : एक्सओ क्लब
